Neyðhjálp sleppur kortini inn í Gasa

Neyðhjálpin, sum sleppur inn í Gasa, verður kortini ikki skorin niður í helvt.

Eftir øllum at døma hevur ísraelska stjórnin gjørt av at sleppa ætlaðu revsitiltøkunum, sum høvdu skorið neyðhjálpina niður í helvt og stongt Rafah-marknaliðið, sum er millum Gasa og Egyptaland. 

Tað skrivar almenni ísraelski miðilin, Kan.

Revsitiltøkini vóru annars fráboðað í gjár, eftir at Hamas í fyrstu syftu bara hevði avhendað fýra av 28 deyðum gíslum. Seint í gjárkvøldið vóru fýra lík aftrat avhendað.

Tað ljóðar eisini, at Hamas fer at avhenda fýra dripnar gíslar aftrat í dag, sambært Times of Israel.

Tí fer Ísrael at lata upp Rafah-marknaliðið í dag og loyva teimum 600 lastbilunum við neyðhjálp inn í Gasa, sum avtalan um vápnahvíld sigur, skrivar miðilin, Kan.