Frítekst tagging:
- Tíðindi, mentan og ítróttur
Verða nú kunnað um Suðuroyartunnilin
Verða nú kunnað um Suðuroyartunnilin
Umboð fyri tunnilsfelagið og ráðgevarafelagið Norconsult eru á fundinum, og sum skilst kunna tey um tvær farleiðir og leggja fram kostnyttukanning
Annika Olsen og Eyðdis Hartmann Niclasen á veg á fund í Tinganesi at verða kunnaðar um tað nýggja í málinum um Suðuroyartunnilin.
Mynd: Bjarni Árting Rubeksen
20.10.2025 - 16:07
Kunningarfundur er í løtuni fyri løgtingsfólkum um Suðuroyartunnilin.
Á fundinum eru, umframt løgtingsfólk og landsstýrisfólk, Teitur Samuelsen, stjóri í tunnilsfelagnum, umboð fyri Nordconsult og umboð fyri Landsverk, og sum skilst kunna tey um tvær farleiðir og leggja fram kostnyttukanning.
Í novembur í fjør varð semja undirritað av umboðum fyri allar politiskar flokkar á løgtingi.
Í semjuskjalinum varð avtalað, at undirsjóvartunnil skuldi gerast millum Djúpadal norðan fyri Skarvanes og Sandvik, við møguleika at knýta Skúgvoy upp í tunnilin seinri.
Onnur linjuføring
Men longu, tá lógaruppskotið um Suðuroyartunnil var til almenna hoyring, vóru sjónarmið frammi um, at ein Suðuroyartunnil skuldi hava eina øðrvísi linjuføring. Skotið varð upp at gera tunnil av Sandi, sum so kundi koma upp í Skúgvoy, og so víðari til Sandvíkar.
Lógaruppskot kom í løgtingið í mars í ár, og tá bar ikki til at fáa málið samtykt. Viðurskifti, ið vórðu viðgjørd í Løgtinginum, vóru m.a. linjuføring og trygd í tunlinum. Málið datt burtur, tá nýggj tingseta byrjaði á ólavsøku.
Løgmaður gjørdi í juni avtalu við politisku forfólkini og politiska fylgibólkin um m.a. at gera avgerðarnotat, ið lýsir tvær farleiðir.
Tá tilfarið er framleitt, verður politisk støða tikin, stendur í tilfarinum til ólavsøkufrágreiðing løgmans í ár.
Meiri verður at frætta í útvarpstíðindunum og í Degi og viku í kvøld.
Myndir: Bjarni Árting Rubeksen
Er kopiera
Nýggjastu sendingar í ÚV
Nýggjastu sendingar í SV
