Klædnaatstøði á Glasi var lopfjøl at lesa víðari

Sarita Thomassen hevur tikið útbúgvingina sum klædnaatstøðingur á Glasi, sum saman við tilvirkisatstøði, eftir ætlan skal niðurleggjast. 

Hon stendur spyrjandi um grundgevingina, at útbúgvingin ikki er førleikagevandi, tí hon lesir nú til kandidat í Keypmannahavn - nakað hon aldrin hevði farið undir, hevði tað ikki verið fyri klædnaatstøði útbúgvingini á Glasi, sigur hon. 

- Við at niðurleggja hesar útbúgvingarnar, so missa vit tær føroysku traditiónirnar og tað føroyska handverki, sum er ein stórur partur av okkara mentan, sigur Sarita Thomassen.

- Nú eru hetta eisini tvær útbúgvingar, sum hava ein meiriluta av kvinnum og kvinnurnar arbeiða serliga innan tað handaliga og søkja hesar útbúgvingar, so við at niðurleggja hesar útbúgvingar, so niðurleggja vit eisini møguleikan hjá nógvum kvinnum at útbúgva seg í Føroyum, sigur hon.