Advokatur skal kanna Strandferðsluna

Sjóvinnustýrið hevur ábyrgdina av at kanna sjálva hendingina, um hekkuportrið varð opið undir sigling 1. september. Sjóvinnustýrið skal eisni meta um, um eitt trygdarbrot er farið fram. Sjóvinnustýrið hevur síðani latið málið til løgregluna. Men tað eru eisini onnur viðurskifti í málinum, sum skulu kannast

Jóhan Christiansen

Caption: 

Jóhan Christiansen, landsstýrismaður í samferðslumálum

Jóhan Christiansen, hevur gjørt av at kanna, hvørt fyrisitingarliga viðgerðin hjá Strandfaraskipum Landsins av fráboðanini um, at hekkuportrið á Galaxy var opið undir sigling, var nøktandi. Fiskivinnu- og samferðslumálaráðið stendur fyri kanningini, og hevur heitt á Gunn Ellefsen, advokat, um at hjálpa við at gera kanningina. Kanningin skal vera liðug í desember í ár. Tað stendur í innliti, sum Kringvarpið hevur fingið í málið.

Galaxy

Endamálið við kanningini, sum Gunn Ellefsen skal gera, er at fáa lýst fyrisitingarligu viðgerðina hjá Strandfaraskipum Landsins av fráboðanini um, at hekkuportrið á Galaxy var opið undir sigling, at meta um, hvørt fyrisitingarliga viðgerðin hjá Strandfaraskipum Landsins av málinum var nøktandi, og/ella hvørt mett verður, at tørvur er á at styrkja mannagongdir, samskifti ella annað í fyrisitingarligu viðgerðini hjá Strandfaraskipum Landsins av slíkum málum í framtíðini.