Fakfeløg vilja hava at vita, nær arbeiðsvikan verður stytt

Fakfeløgni í Fakfelagssamstarvinum vilja nú at hava vit frá samgonguflokkunum, nær arbeiðsvikan verður stytt.

Tey hava skrivað alment bræv til Aksel V. Johannesen, formann í Javnaðarflokkinum, Sirið Stenberg, forkvinnu í Tjóðveldi, og Ruth Vang, forkvinnu í Framsókn, um málið.

Tey sjey fakfeløgini vísa á, at stytt arbeiðsvika var eitt av vallyftunum hjá Javnaðarflokkinum og Tjóðveldi upp undir seinasta løgtingsval. Styttri arbeiðsvika er eisini partur av samgonguskjalinum millum Javnaðarflokkin, Tjóðveldi og Framsókn.

Nú eitt gott ár er eftir av valskeiðnum, er arbeiðsvikan framvegis ikki stytt. 

Styttri arbeiðsvika hevði lætt munandi um hjá øllum løntakararunum, serstakliga hjá barnafamiljum. Men nú tigur samgongan um ætlaninar um at stytta arbeiðsvikuna, siga feløgini í Fakfelagssamstarvinum.