Landssjúkrahúsið sparir 7,7 milliónir í rakstrinum

Landssjúkrahúsið hevur í dag framt sparingar fyri 7,7 milliónir krónur. 

- Samanumtikið kann eg siga, at tað eydnaðist at spara pengarnar, uttan at tað gongur beinleiðis út yvir sjúklingarnar, sigur Steinar Eirikstoft, sjúkrahússtjóri.

Sparingarnar verða í høvuðsheitum framdar á tann hátt, at ymiskt virksemi ikki verður sett í gongd eins og ætlað, pengar verða spardir á fíggjar- & kt-deildini og í tænastudeplinum. Eisini verður tað dýrari hjá útlendingum at fáa hjálp frá føroyska sjúkrahúsverkinum.

Hetta er annað árið á rað, at sparingar skulu gerast í rakstrinum. Í játtanini fyri 2025 skuldi landssjúkrahúsið spara 7,4 milliónir krónur. Í játtanini fyri 2026 skulu sum nevnt sparast 7,7 milliónir.

Sparingarnar merkja eisini, at trý starvsfólk á Landssjúkrahúsinum í dag hava fingið ætlanarskriv um uppsøgn, og tvey hava fingið ætlanarskriv um, at tey skulu niður í tíð.

- Nú eru vit komin hartil, at tað ber ikki til at spara meira, uttan at tað gongur út yvir sjúklingarnar, sigur Steinar Eirikstoft.

Leiðslan á Landssjúkrahúsinum hevur gjørt eina frágreiðing, ið lýsir aktuellu sparingarnar. Frágreiðingin kann lesast HER.

Hoyr innslag við Steinari Eirikstoft: