Golden League: Norra vil hava lítla hevnd

Norðmenn hava ikki gloymt EM-javnleikin ímóti Føroyum fyri smáum tveimum árum síðan, tá Elias Ellefsen á Skipagøtu javnaði við brotskasti í evstu løtu.

Í Golden League-leikskránni sigur liðfelagin hjá Hákuni West av Teigum úr Füchse Berlin, Tobias Grøndahl, at Norra fegið vil hava eina lítla hevnd, tá londini bresta saman í Golden League-dysti seinnapartin.

 - Tað er júst tað, sum kann gerast heilt perfekt. Vit hava jú ein føroyskan høgra vong (í Füchse Berlin, blaðm.), sum vit vilja hava eina lítla hevnd ímóti, og so eru tað danskararnir, sum vit ongantíð vinna á, segði Tobias Grøndahl undan kappingini í Tróndheimi.

Norra megnaði heldur ikki hesa ferð at vinna á dønum - Danmark vann 38-33 í fyrsta umfari hósdagin - og so er spurningurin, um tað eydnast Tobias Grøndahl og hinum úr Norra at vinna á Føroyum í dag.

Føroyar taptu við einum máli fyri Hollandi hósdagin, og venjararnir hava givið ábendingar um, at teir fara at geva onkrum av lyklaspælarunum hvíld í dag, áðrenn dystin ímóti Danmark í morgin.