Stóra rúsevnismálið: Dómarnir herdir - tann frídømdi eisini dømdur

Nú eru greitt, at fimm av teimum seks, sum vórðu skuldsett í stóra rúsevnismálinum, sum var fyri í Føroya rætti í mars í ár, vera dømd. 

Eftir viðgerðina kom Føroya rættur í mars mánað til ta niðurstøðu, at fýra menn fingu langa fongsulsrevsing, úr seks upp í 11 ár og tvey fólk, ein maður og ein kvinna, vórðu frídømd.

Allir fýra dømdu menninir kærdu sínar dómar, tríggir av teimum kravdu frídøming og ein kærdi fyri at fáa linari dóm. Ákæruvaldið kærdi eisini fyri at fáa harðari dóm og eisini fyri at fáa tann frídømda dømdan.

Málið gongur í tveimum, fýra av málunum eru viðgjørd í Eystara landsrætti í Keypmannahavn, tí pláss var ikki fyri málinum í Føroyum, og tann seinasti verður so viðgjørdur, tá Eystari landsrættur kemur til Føroya í næstu viku.

Og úrslitið var, at allir fýra, sum vórðu til viðgerar í Keypmannahavn í dag fingu dóm. Eisini tann, sum varð frídømdur í Føroya rætti. Hann fekk átta ára fongsulsrevsing í Eystara landsrætti í dag, og tað er ein rættiliga ógvislig broyting samanborið við, at hann var frídømdur í Føroya rætti.

Tveir av hinum fingu harðari dóm, eitt ár varð lagt afturat hjá hvørjum teirra, og dómurin hjá tí, sum fekk harðasta dómin, varð staðfestur.

Dómarnir í Eystara landsrætti fullu soleiðis:

- 32 ára gamal maður: 7 ára fongsulsrevsing (6 ára fongsulsrevsing í Føroya Rætti)
- 41 ára gamal maður: Staðfesting av dómi (11 ára fongsulsrevsing í Føroya Rætti
- 46 ára gamal maður: 8 ára fongsulsrevsing (7 ára fongsulsrevsing í Føroya Rætti)
- 44 ára gamal maður: 8 ára fongsulsrevsing (Fríkendur í Føroya Rætti)

Seinasta kærumálið er hjá tí 43 ára gamla, sum fekk átta ára fongsulsrevsing, verður viðgjørt í Føroya rætti í komandi viku, skrivar Føroya Politi í tíðindaskrivi. Tann dømdi hevur kært fyri at fáa linari dóm.
Trýst á pílin niðanfyri og hoyr innslagið og alla samrøðuna við Katrina Thorsvig í tíðindasendingini klokkan 18: