Eldfimur Elias var ikki nóg mikið ímóti Hákuni og Berlin

Elias Ellefsen á Skipagøtu skeyt 12 mál og legði upp til fýra fyri Kiel, sum vitjaði Füchse Berlin og Hákun West av Teigum í týska høvuðsstaðnum leygardagin.

Tað var kortini ikki nóg mikið, tí tað var føroyski landsliðsvongurin á heimaliðnum, sum kortini endaði omaná í týðandi 32-29 sigri í Max-Schmeling-Halle.

Stórdrama millum meistara og steypavinnara

Heimaliðið var frammanfyri mestsum allan dystin. Føroyski spælskiparin hjá Kiel fann ikki flogið beinanvegin, og við millum annað tveimum málum frá Hákuni West av Teigum, vann Berlin seg fleiri málum.

Elias Ellefsen á Skipagøtu fótaði sær kortini, og saman við Eric Johansson syrgdi hann fyri, at munurin í hálvleikinum bert var tvey mál.

Føroyska Kiel-stjørnan skeyt eisini trý tey fyrstu málini hjá útiliðnum eftir steðgin, men tað var heimaliðið, sum spakuliga økti um leiðsluna, sum var fimm mál, tá 19 minuttir vóru eftir.

Eldfimur Elias dróg Kiel innaftur

Tá tók føroyski spælskiparin av álvara um endan aftur. Upp á 10 minuttir skeyt Elias Ellefsen á Skipagøtu fimm mál og legði upp til eitt. Millum málini var nummar 100 í Bundesliguni í ár og útjavnandi málið til 27-27 í 53. minutti.

Tað var kanska lagnunnar speisemi, at Hákun West av Teigum fekk næsta kjansin hjá Füchse Berlin. Hann setti sítt fimta mál í netið eftir 10 minuttir langan Berlin-málturk, og hóast tað eydnaðist Keil at javna tvær ferðir afturat, vóru tað teir grønu, sum við bjargingum frá stórspælandi Dejan Milosavljevic og trimum teimum síðstu málunum í dystinum, tryggjaðu sær sigurin.

Við sigrinum komu Hákun West av Teigum og teir upp undir liðina á Elias Ellefsen á Skipagøtu og Kiel á 3. plássi við 18 stigum. Magdeburg vann á Flensburg og leyp upp á 1. plássi við 21 stigum og einum dysti til góðar, meðan Flensburg framvegis hevur 20 stig.