Útflutningurin er vaksin 1,4 milliardir seinasta árið

Føroyar útfluttu fyri 13,3 milliardir krónur frá oktober í fjør til september í ár.

Hetta eru 1,4 milliardir meira enn frá oktober 2023 til september 2024.

Serliga er útflutningsvirðið fyri makrel vaksið meira enn 1,1 milliard krónur, tað eru 131 prosent.

Tað mesta kemur frá prísvøkstri, skrivar Hagstovan.

Útflutningurin av so at siga øllum fiskasløgum veksur.

Men útflutningsvirðið á laksi, fóðri, lýsi og fiskamjøli er minkað. Útflutningurin av fóðri, fiskamjøli og lýsi er minkaður 522 milliónir krónur. 

Útflutningsvirðið á laksi minkaði 273,4 milliónir krónur. Prísurin er minkaður 15 prosent.

Fimm lond keypa fiskavørur fyri yvir eina milliard krónur um árið úr Føroyum. 

Tey eru USA, Danmark, Russland, Bretland og Spania. 

Vend er komin í útflutningin til Russlands, sum minkaði nógv, tá laksaútflutningurin hagar steðgaði í 2022.

Men gongdin er nú vaksandi, skrivar Hagstovan. 

Føroyar útfluttu fyri 54,3 milliónir krónur til Russlands í september í ár.