Dýrari hjá gomlum at fáa hjálp

Á nýggjárinum fer tað at kosta meira hjá teimum gomlu í Tórshavnar kommunu, sum fáa hjálp frá kommununi.

Býráðið hevur samtykt at hækka gjøldini fyri búpláss, heimahjálp og umlætting sambært uppskoti um felags leist hjá Kommunufelagnum fyri 2026.

Kunngerð um eldratænastur kom í gildi 1. apríl 2023.

Hon gevur kommunum heimild til sjálvar at áseta gjøld fyri sínar eldratænastur. 

Búpláss hækkar 311 kr.

Gjaldið fyri búpláss hækkar 311 krónur hjá teimum, sum hava minstu inntøku umframt fólkapensjón og samhaldsfasta og 575 krónur hjá teimum, sum hava størstu inntøkuna.

Heimahjálpin verður tvær til tíggju krónur dýrari. Tó er eingin hækking hjá teimum, sum tjena 50.000 kr, ella minni.

Og umlætting verður átta krónur dýrari um samdøgrið, 56 kr. fyri eina viku og 224 krónur fyri fýra vikur.