Krøv setast til arbeiði við stórum og vandamiklum tólum

Krøv eiga at vera sett til arbeiðsfólk, sum arbeiða við stórum og vandamiklum arbeiðstólum. 

Tað halda umboð fyri fakfeløg og Vinnuhúsið í Arbeiðsumhvørvisráðnum. Men tey eru ikki samd um støddina á bótini fyri brot á Arbeiðsumhvørvislógina.

Føroyar hava lutfalsliga nógvar deyðiligar arbeiðsvanlukkur, roknað í mun til tal av arbeiðsvirknum fólkum. Samanborið við lond í Evropa, eru Føroyar eitt hitt vandamesta og klárt hitt vandamesta millum Norðurlond.

Jóhan Carl Dam umboðar fakfeløg í sonevnda Arbeiðsumhvørvisráðnum, sum er knýtt at Arbeiðs- og brunaeftirlitinum. Hann hevur eitt boð upp á, hví tað er vandamikið at arbeiða í Føroyum.

Vinnuhúsið tekur undir við, at krøv skulu setast til starvsfólk, ið arbeiða við tungum amboðum. Marius Thomassen, ráðgevi, umboðar Vinnuhúsið í Arbeiðsumhvørvisráðnum.

Umboðið fyri fakfeløgini veit annars at siga, at arbeitt verður við at seta krøv til starvsfólk, ið arbeiða við stórum maskinum.

Sum reglur og umstøður eru í løtuni, so hevur Arbeiðs- og brunaeftirlitið ikki heimild til at lata størri bøtur enn 40.000 krónur fyri brot á Arbeiðsumhvørvislógina. Tað heldur Jóhan Carl Dam ikki vera nøktandi, tá talan er um stórar fyritøkur.

Umboðið fyri Vinnuhúsið leggur dentin á fyribyrging av arbeiðsvanlukkum heldur enn á støddina á bótum, sum Arbeiðs- og brunaeftirlitið kann lata.

Hoyr meira í innslagi í útvarpstíðindunum: