Vinnarin av merktum toski er funnin

Havstovan hevur í næstan 30 ár skipað fyri fiskamerkingum, sum kann siga nakað um føroyska fiskastovnin.

Og í dag bleiv hepni vinnarin funnin.

Vinnarin úr Klaksvík

Hepni vinnarin gjørdist fiskimaðurin Johan Klakstein úr Klaksvík, sum siglur við trolbátinum Jens Leon.

- Tað var ótrúliga stuttligt, segði Johan Klakstein, sum gjørdi klárt til ein túr, tá Petur Steingrund fekk orðið á hann við gleðiligu boðunum.

Hann vinnur 12.500 krónur fyri at hava latið inn merkta toskin, sum hevði verið úti á sjógvi í gott eitt ár, áðrenn hann bleiv fangaður úti móti Nólsoyarbanka.

Fiskamerking gevur týdningarmikla vitan

Síðani 1997 hevur Havstovan skipað fyri fiskamerking, og hetta gevur týdningarmikið innlit í føroyska fiskastovnin.

- Hetta sigur nakað um ferðing og vøkstur á fiski, og í síðsta enda stuðlar tað okkum í at fáa eina betri umsiting av føroysku fiskastovnunum, sigur Petur Steingrund, fiskafrøðingur á Havstovuni.

Meira verður um evnið í Dag og viku í kvøld kl. 19.00