Tjørnuvíkartunnilin skal gerast

Játtanin fyri næsta ár til at gera tunnil til Tjørnuvíkar er ov lítil. Tað heldur Landsverk. Ruth Vang, landsstýriskvinna í fíggjarmálum, er tó ikki heilt samd.

Í fíggjarlógaruppskotinum fyri næsta ár eru tilsamans 15 milliónir krónur tøkar til at gera Tjørnuvíkartunnilin. Men, stendur tað til Landsverk, so skulu millum 30 og 40 milliónir krónur játtast um árið fyri at fáa eina skilagóða arbeiðsgongd við tunnilsgerðini.

Ruth Vang, sum í gjár hevur yvirtikið málsøkið samferðslumál, sigur, at í hesum umfarinum eru ikki fleiri pengar at finna til Tjørnuvíkartunnilin.

Landsstýriskvinnan í fíggjarmálum leggur tó afturat, at teir pengar, sum verða játtaðir til Tjørnuvíkartunnilin, verða brúktir til Tjørnuvíkartunnilin, og at tunnilin verður gjørdur.

Verkætlanin at gera Tjørnuvíkartunnil er liðugt prosjekterað. Í fíggjarlógaruppskotinum fyri næsta ár eru 10 milliónir krónur frá í ár framfluttar umframt aðrar 5 milliónir játtaðar, so at ætlandi verða 15 milliónir krónur tøkar at gera Tjørnuvíkartunnilin næsta ár.

Men tað heldur Landsverk vera ov lítið. Fyri at hava eina skilagóða arbeiðsgongd við tunnilsgerðini metir Landsverk, at neyðugt verður við eini árligari játta á millum 30 og 40 milliónir krónur.

Samferðslumál eru nýtt málsøki hjá Ruth Vang. Áðrenn hava tey ligið hjá Fiskivinnu- og samferðslumálaráðnum, men tá landsstýrið formliga varð umskipað í gjár, varð tað flutt til Fíggjarmálaráðið at umsita.

Hoyr meira í innslagi í útvarpstíðindunum: