Kunngerðin lýst - kunnu fara til útróðrar í morgin

Eirikur í Jákupsstovu, landsstýrismaður við tilfeingis- og vinnumálum, hevur nú lýst kunngerðina um broytingarnar í kunngerðini um fiskidagar, sum ger, at bólkur 5 fær fleiri fiskidagar. 

Orðaljóðið í kunngerðini er, at í grein 5 verður sum stk. 4 sett: 
“Stk. 4. Umframt fiskidagar sambært § 3, nr. 5 verða, fyri tíðarskeiðið frá 1. oktober 2025 til 31. desember 2025, ásettir fiskidagar til bólkin við støði í talinum av fiskidøgum, sum bólkurin ikki brúkti í fiskiárinum 2024, tó í mesta lagi 10% av tillutaðu fiskidøgunum í 2024.”

Hetta hevur við sær, at  fiskidagar, sum bólkur 5 ikki brúkti í 2024, kunnu brúkast í ár, og tað merkir í stuttum, at útróðrarmenninir kunnu fara til fiskiskap.

Tað kunnu teir longu í morgin, tí kunngerðin kemur í gildi dagin eftir, at hon er lýst stendur í grein 2.

Gekk skjótt at avgreiða málið

Tað gekk skjótt at fáa uppskotið, sum Jacob Vestergaard, Bárður á Steig Nielsen, Jóhannis Joensen og Árni M Dam vóru upphavsmenn til, gjøgnum løgtingið. Tað varð lagt fyri Løgtingið 11. november, tað var endaliga samtykt við 3. viðgerð 2. desember, og nú, tann 5. desember, er tað longu lýst.

Tað er tó ikki upprunauppskotið, sum er samtykt. Upprunauppskotið legði upp til, at broyta lógina, so bólkur 5 skuldi koma undir somu skipan sum aðrir bólkar.

Men áðrenn atkvøðugreiðsluna við 2. viðgerð kom eitt broytingaruppskot frá samgongutinglimunum Anniku Olsen, Una Holm Johannesen og Bjarna Kárasyni Petersen, sum broytti uppskotið soleiðis, at landsstýrismaðurin fær heimild til at broyta treytirnar hjá bólki 5 so, at óbrúktir fiskidagar í fjør kunnu flytast til ár. 

Tað var tað, sum løgtingið samtykti týsdagin, og tá samtykti løgtingið eisini, at landsstýrismaðurin bara kann brúka hesa heimildina í ár og næsta ár. Tí heimildin fer úr gildi aftur 1. januar 2027.