Atfinningar móti avstralsku stjórnini eftir yvirgang

Tað var seinnapartur á degi á Bondi Beach við avstralska stórbýin Sydney, tá tveir menn í døkkum klæðum stillaðu seg á eina gongubrúgv oman fyri sandin, og lyftu byrsurnar at skjóta eftir eini mannamúgvu, sum taldi fleiri hundrað fólk, sum vóru komin saman á strondini at hátíðarhalda fyrsta dagin í Hanukkah - átta daga longu ljóshátíðina, sum jødar halda.

Tað eydnaðist monnunum at drepa 11 fólk, og særa 29 onnur.

Watch: Bondi Beach bystander tackles shooter from behind and grabs his gun https://t.co/HyIuEnlquv

— BBC Breaking News (@BBCBreaking) December 14, 2025

Ein óvápnaður borgari, Ahmed al Ahmed, sníkti seg inn á annan byrsumannin og tók hann, og tók byrsuna av honum. Tilburðurin var filmaður, og videobrotið av hetjugerninginum fær nógv heiðrandi orð, eisini frá ísraelska forsætisráðharranum Benjamin Netanyahu. Til ber at síggja tilburðin hjá eitt nú  ABC News.

 - Vit sóu verkið hjá einum djørvum manni, einum djørvum muslimskum manni, skuldi tað vísa seg, og eg fagni honum, segði Netanyahu. 

Men Netanyahu hevði hvøss orð til avstralsku stjórnina. Hann skrivar í boðum á sosiala miðlinum X, at hann sendi sjálvur eitt bræv til avstralska forsætisráðharran Anthony Albanese í august, og segði við hann, at avgerðin at viðurkenna Palestina sum stat, kundi styrkja antisemitiskar ekstremistar, og leggja upp til illvilja ímóti jødum, og finst at avstralsku stjórnini fyri ikki at hava gjørt nóg mikið at byrgja uppfyri antisemitismu í Avstralia.

Avstralska stjórnin fekk í juli eina rapport frá serliga antisemitismu-umboðsmanninum, men hevur ikki tikið støðu til tilmælini í frágreiðingini. Jillian Segal, sum er antisemitismu-umboðsmaður, segði í dag eftir yvirgangsálopið, at nú hendi tað, sum jødiska samfelagið í Avstralia hevur óttast fyri fór at henda, og at "ávarað varð um at hetta kundi henda", sambært ABC news.