Arbeiða framvegis við tjóðleikhúsi á Bursatanga

Tórshavnar kommuna arbeiðir framvegis við ætlanini, at tjóðleikhús skal gerast á Bursatanga í Havn. 

Tað váttar Elsa Berg, borgarstjóri, nú fíggjarnevndin í løgtinginum skjýtur upp at strika játtanina til tjóðleikhús næsta ár.

Í 2021 var avgerð tikin í eini serligari dómsnevnd, at Bursatangi í Havn var besta staðið til eitt komandi føroyskt tjóðleikhús.

Men soleiðis bleiv tað ikki. Ið hvussu so er ikki í fyrstu atløgu.

Fyri einum ári síðan samtykti táverandi Tórshavnar býráð "aðra staðseting enn Eystara havnarøki", sum tað eitur í gerðabókini. Tað vil siga, at býráðið vildi ikki, at tjóðleikhús skuldi gerast á Bursatanga.

Men 1. januar í ár tók nýtt býráð við, við nýggjum meiriluta og nýggjum borgarstjóra, og Elsa Berg tók við sum borgarstjóri.

Í fíggjarlógaruppskotinum fyri næsta ár hevur landsstýrið skotið upp, at ein millión krónur skal setast av til at gera tjóðleikhús.

Tjóðleikhús, arkitektakapping um tjóðleikhús

Soleiðis var hildið, at nýggja tjóðleikhúsið á Bursatanga kundi taka seg út. 

Strika játtanina

Í viðmerkingunum stendur, at "Bíðað verður (...) eftir, at Tórshavnar kommuna vendir aftur til landsstýrið um staðsetingina. Tá ið lendissáttmáli er gjørdur, og vissa er fingin fyri staðsetingini, er ætlanin at leggja fyri Løgtingið lógaruppskot, ið fer at heimila landsstýrinum at taka ímóti uttanhýsis fígging og at geva tilsøgn um landsins part av fíggingini. Síðani verður farið undir víðari fyrireikingar, at gera skipanaruppskot og prosjektering."

Framfluttar verða 7,6 mió. kr. í óbrúktari játtan, og er tøka játtanin tískil 8,6 mió. kr. í 2026.

Men, nú er fíggjarlógarálit gjørt, og meirilutin í løgtingsins fíggjarnevnd skjýtur upp at strika ætlaðu játtanina fyri næsta ár upp á eina millión krónur til at gera tjóðleikhús.

Elsa Berg

Elsa Berg. 

Gongd í málinum 

Kringvarpið hevur tosað við Elsu Berg, borgarstjóra í Tórshavnar kommunu, um staðsetingina av ætlaða tjóðleikhúsinum. Hon vil ikki gera bandaða samrøðu í dag, men hon sigur, at gongd er í málinum.

Staðsetingin, sum arbeitt verður við, er á Eystara havnarøki. Tað vil siga á sama stað sum frammanundan, men við onkrum tillagingum. Málið verður væntandi klárt til politiska støðutakan fyrst í nýggja árinum. 

Hoyr innslag í útvarpstíðindunum: