Nú skal ferð setast á í Leitinum í Saltangará

Tað eydnaðist ikki fyrrverandi eigaranum, Skt. Jørgens Ejendomme Aps, sum umvegis smápartafelagið í Leitinum átti grundøkið ovast í Saltangará, at fáa glið á byggjaríið. Tí keypti Runavíkar kommuna grundøkið aftur og beint fyri jól seldi kommunan tað enn einaferð.

Keyparin hesaferð er spf. Jóan Petur Vang, og ætlanin hjá felagnum er júst tann sama - at byggja íbúðir á økinum, sum skulu seljast áhugaðum keyparum.

Jóan Petur Vang eigur smápartafelagið og hann er eisini stjóri, og gongur tað eftir ætlan, so verður hol sett á arbeiðið í summar ella har á leið.

Spf. Jóan Petur Vang hevur longu gongd í tveimum íbúðarverkætlanum í Runavík, men tær liggja við sjóvarmálan, frammanfyri gamla timburhandilin, tað er nú blivið til handilsdepilin Bryggjan, har millum annað Bónus, Rumbul, Skálkur og Sunset halda til.

Har vera bygdar 45 íbúðir í tveimum bygningum, tann fyrsta er væl á veg og farið verður undir ta næstu rættiliga skjótt, sigur Jóan Petur Vang.

- Ætlanin er so, at fara undir hesa stóru verkætlanina, tá arbeiðið við seinna bygninginum á havnarlagnum er liðugt. Tí er neyðugt at tað gongur skjótt fyri seg at fáa loyvi upp á pláss, sigur stjórin.

Enn er ikki greitt, hvussu ætlanin í Leitinum fer at síggja út, tí enn er bara grundøkið keypt. Har ein ætlan, men hon er ikki fest á pappír enn, tað verður gjørt í næstum, skilst á Jóan Peturi Vang.

Spurdur, hvussu áhugin er at keypa, sigur hann, at hann framvegis er stórur. 

- Tað er allatíðina ein eftirspurningur, men tað er greitt, at vit fara ikki at byggja 150 íbúðir í einum, sum vit so skulu selja. Vit fara at byggja hetta í stigum, sum tað sær út nú, í seks stigum, sigur Jóan Petur Vang.

Trýst á leinki niðanfyri og hoyr alt innslagið við Jóan Petur Vang.