Býráðið í Runavík verður sitandi

Umval verður kortini ikki í Runavíkar kommunu týsdagin.

Tað er niðurstøðan hjá dómaranum, sum nú hevur skorið ígjøgnum og gjørt úrskurð í sivilsakarmálinum, sum fimm býráðslimir í Runavíkar kommunu reistu móti Fíggjarmálaráðnum.

Teir fimm býráðslimirnir, teirra millum borgarstjórin og varaborgarstjórin, hava stevnt Fíggjarmálaráðnum, sum nú umsitur kommunumál. Býráðslimirnir vildu hava avgerðina hjá táverandi Løgmálaráðnum - um at ógilda kommunuvalið og lýsa umval - strikaða.

Tað vil siga, at umvalið, sum er lýst at verða týsdagin í næstu viku, skal steðga, til málið er endaliga avgjørt av dómsvaldinum.

Og hesum tekur dómarin undir við. Umval verður tí ikki í Runavíkar ommunu týsdagin 13. januar.

Sí úrskurðin her.

Málið var fyri í Føroya rætti týsdagin. Dómarin vildi tó hava umhugsanartíð. Og tí er úrskurður ikki sagdur fyrr enn í dag.

Sigurjón Einarsson

Sigurjón Einarsson.

Hoyr samrøðu við Sigurjón Einarsson, sum hevur fylgt málinum í rættinum fyri Kringvarpið:

Tað vóru sum nevnt fimm av 11 býráðslimum í Runavík, sum stevndu Fíggjarmálaráðnum, sum nú umsitur kommunumál.

Tey vóru Torbjørn Jacobsen, borgarstjóri, Tóri Højgaard, varaborgarstjóri, Sigrún Jónsveinsdóttir, Jóhan Vest, og Petur Hansen.

Býráðslimirnir vildu hava avgerðina hjá táverandi Løgmálaráðnum - um at ógilda kommunuvalið og lýsa umval - strikaða. 

Hvørki Fíggjarmálaráðið ella advokaturin hjá ráðnum vildu gera viðmerkingar, beint eftir at úrskurðurin var sagdur í Føroya rætti seinnapartin.