Danmark og Nato styrkja verjuna í Grønlandi

Danska verjan økir nú hjáveru sína í Grønlandi.

Tað boða danska verjumálaráðið og grønlendska uttanríkisráðið frá í tíðindaskrivi stutt fyri fund millum Danmark, Grønland og USA í Washington.

Sagt verður, at skipað verður fyri fleiri hernaðarligum venjingum í Grønlandi, í tøttum samstarvi við sameind lond í Nato.

- Trygdin í Arktis er av avgerandi týdningi fyri kongsríkið og okkara sameindu í Arktis, og tí hevur tað týdning, at vit í tøttum samstarvi við okkara sameindu styrkja førleikan at vera í økinum, sigur Troels Lund Poulsen, verjumálaráðharri, í tíðindaskrivinum. 

Vivian Motzfeldt

Vivian Motzfeldt. (Mynd: Sermitsiaq)

Hernaðarligar venjingar

Í tíðindaskrivinum frá grønlendska uttanríkisráðnum stendur, at danska verjan fer at økja virksemi í sambandi við ymsar hernaðarligar venjingar.

- Tað hevur við sær, at í næstum verður økt hernaðarlig hjávera bæði í Grønlandi og kring Grønland, við flogførum, skipum og herfólki, eisini frá Nato-sameindum, stendur í tíðindaskrivinum. 

Vivian Motzfeldt, landsstýriskvinna í uttanríkismálum, sigur, at sum partur av Nato-samgonguni hevur tað fremstu raðfesting hjá landsstýrinum, at verjan og trygdin í Grønlandi og kring Grønland verður styrkt, og at hetta verður gjørt í samstarvi við sameind í Nato.