Lars og Vivian til reiðar at fara á fund við Vance og Rubio

Lars Løkke Rasmussen, uttanríkisráðharri, og Vivian Motzfeldt, landsstýriskvinna í uttanríkismálum í Grønlandi, fara um ein tíma, klokkan 15.30,  á søguliga fundin við amerikanska varaforsetan, J.D. Vance, og Marco Rubio, uttanríkisráðharra. 

Upprunaliga skuldi fundurin vera í Hvítu húsunum, men hann er nú fluttur til Eisenhower Executive Office Building, sum liggur beint upp at Hvítu húsunum.

Sambært Lotte Mejlhede, korrespondenti hjá TV2 í USA, kann hetta tulkast sum, at tað ikki verður heilt so nógv trýst á til henda fundin, sum tað annars hevur verið róð framundir.

Donald Trump segði annars fyrr í morgun, at NATO eigur at tryggja, at USA fær Grønland. 

- Tað er avgerandi fyri Golden Dome, sum vit eru í holt við at byggja. NATO eigur at ganga fremst fyri at tryggja, at vit fáa Grønland. Gera vit tað ikki, fara Russland ella Kina at gera tað, og tað hendir ikki, segði Trump.