Bygdaleiðir skulu dagførast og mennast

Strandfaraskip landsins ætla at dagføra og menna tænastuna hjá Bygdaleiðum.

Søkt verður eftir verkætlanarleiðara til komandi útbjóðing av Bygdaleiðum.

Verkætlanarleiðarin skal savna vitan og royndir frá verandi busskoyring, endurskoða verandi ferðaætlanir, endurskoða tænastustigið hjá Bygdaleiðum og endurskoða leistin fyri fíggjarstýring hjá Bygdaleiðum.

Leiðarin skal eisini dagføra menningarætlan um tøkni og samskiftismarkamót hjá Bygdaleiðum, gera kravfesting fyri bussarnar og umhvørvisloysnir, gera dagførdar mannagongdir um góðskustýring, eftirlit og trygd og samskipa løgfrøði og endaligt útboðstilfar.

Talan er um eitt fulltíðarstarv.

Tá verkætlanin er liðug, verður starvið til fast starv í umsitingini, har uppgávu- og ábyrgdarøkið er tað sama.

Umsóknarfreistin er 9. februar.