Góðar 24 milliónir til at umvæla og útbyggja Listasavnið

Ein samd fíggjarnevnd tekur undir við at játta 24,3 milliónir krónur til Listasavn Føroya í sambandi við, at Listasavnið skal umvælast og útbyggjast.

Arbeiðið byrjar í fyrsta ársfjórðingi í ár, og verður eftir ætlan liðugt í 2028. Tilsamans kostar arbeiðið 70,8 milliónir krónur. 

Fíggjarnevndin tekur undir við leistinum, har Listasavnið fær tilsamans 41 milliónir krónur úr trimum donskum grunnum og 5,5 milliónir frá Tórshavnar kommunu. 

Restin, 24,3 milliónir krónur, skal løgtingið játta.

Løgtingið játtar pengarnar yvir fleiri ár. Byrjað var í 2023, og síðsta játtanin verður ikki fyrr enn í 2027 ella 2028.

Uppskotið gevur harumframt lógarheimild til at taka ímóti uttanhýsis fíggingini, sum er játtað Listasavni Føroya.