Sement flutt til oktober

Tónleikakappingini Sement er í dag eitt av sterkastu boðunum upp á eina veruliga lopfjøl til eina tónleikakarrieru í Føroyum.

Tiltakið gevur ungum, eldri, royndum og óroyndum tónleikarum møguleika at vísa seg fram, knýta sambond og menna seg fakliga.

Yvirlitið yvir vinnarar vísir eisini, at tey, ið vinna Sement, eru komandi stjørnurnar á føroyska tónleikapallinum, eitt nú Hamferð, Konni Kass, Joe & the Shitboys, Jasmin, Tamara, Marius DC og Aggrasoppar. 

Tað eru ikki bara vinnararnir, ið hava sjósett sína tónlistayrkisleið í Sement. Nøvn sum RSP, Ronja og Tunghoyrt hava øll spælt seg inn í tilvitskuna hjá føroyingum á Sement. 

Myndareportasja: SEMENT22

Flytur til heystið

Seinastu árini hevur Sement verið hildið í mars/apríl. Í ár hava fyriskipararnir tó gjørt av at flyta tiltakið til oktober.

Hetta er gjørt fyri at sleppa undan, at Sement liggur ov tætt upp at bæði FMA og SPOT Festivalinum, siga fyriskipararnir í tíðindaskrivi. 

"Við at flyta Sement til oktober fær tiltakið betri arbeiðsfrið. Somuleiðis er oktober ein tíð, har lítið annað stórt hendir á tónleikapallinum, og tað gevur Sement betri sjónligheit og størri fokus á luttakararnar."

Fyriskipararnir halda, at hetta fer at styrkja Sement og skapa enn betri karmar fyri tiltakið.

Myndareportasja: SEMENT22

Yvirlit yvir vinnarar 

Síðani byrjanina í 2010, so hevur Sement fostrað fleiri stjørnur á føroyska tónleikapallinum.

Her er eitt yvirlit yvir vinnararnar seinastu árini: 

2025: Hans Andrias
2024: Gówa 
2023: Aggrasoppar 
2022: Marius DC 
2021: Joe & The Shitboys 
2020: Tamara 
2019: Reality Bites 
2018: Fróði Bjarnason 
2017: Jasmin 
2016: Blusette 
2015: Konni Kass 
2014: Lyon and The Color Storm 
2013: The Absent Silver King 
2012: Sleepless Ghosts 
2011: Guðrun & Bartal 
2010: Hamferð 

Kringvarp Føroyar hevur sent Sement í sjónvarpinum seinastu árini. Sement kann síggjast HER. 

Her niðanfyri kanst tú síggja Sement-finaluna frá 2025.