Stóru málini gera av, nær valið verður

Róð hevur verið fram undir, at løgtingsval verður eftir ólavsøku, men um stóru málini hjá samgonguni, so sum suðuroyartunnilin og hækkanin av pensjónsaldrinum, ikki koma undir land, so kann tað vera, at valið verður áðrenn tað, sigur Barbara Holm ábyrgdarstjóri hjá Frihedsbrevet.

Vit hava seinastu tíðina sæð politiskar flokkar royna at markera seg á ymsum økjum, og hetta er partur av fyrireikingunum til komandi valið, tí um tú sleppur at avgera, hvat kjakast verður um undan valinum, kann tað hava góða ávirkan á talið av atkvøðum tú fært.

- Í Føroyum hava vit bæði vinstra/høgra og loysing/samband, og tað plagar at vera sagt, at tá kjakið snýr seg um høgra/vinstra evnir, so klára Javnaðarflokkurin og Fólkaflokkurin seg væl, og er tað loysing/samband, so eru tað Tjóðveldi og Sambandsflokkurin, sum klára seg nokkso væl, greiðir Barbara Holm frá.

Hon leggur tó afturat, at sosialu miðlarnir hava broytt politiska samskiftið, tí nú kunnu øll miðla tann boðskap tey vilja, tá tey vilja.

Tað, sum arbeitt verður við innanhýsis í flokkunum nú teir fyrireika seg til eitt komandi løgtingsval, er til dømis at fáa fólk á uppstillingarlistarnar, at finna boðskapirnar, sum skulu hoyrast aftur í meldrinum av kunning, sum verður, og hjá politikarunum at vera so sjónlig sum gjørligt.

Hoyr meira her: