Frítekst tagging:
- Tíðindi, mentan og ítróttur
Kyndil og H71 fóru við steypunum
Kyndil og H71 fóru við steypunum
Kvinnurnar hjá Kyndli vunnu trygt á VÍF, meðan H71 veruliga gjørdi bart við stórsigri á Kyndli í mansfinaluni
Kyndil fegnast eftir sannførandi steypasigur á VÍF
Mynd: Bárður Lydersen
21.02.2026 - 23:06
Fólk fingu góðan hondbólt, men tað var eiðasørt við spenningi, tá kvinnurnar hjá Kyndli og menninir hjá H71 fóru avstað við steypagullinum við Tjarnir leygarkvøldið.
Hetta kom ikki óvart á. Tær grønu úr Havn og teir svørtu úr Hoyvík vóru skýrd favorittar undan finalunum, og bæði liðini livdu gott og væl upp til leiklutin.
Turið Arge Samuelsen skeyt sum ikki einaferð flest mál fyri Kyndil, meðan Gylta á Neystabø stóð væl í hinum endanum, og so var lítið at gera hjá VÍF. (Mynd: Bárður Lydersen)
Kyndil ongantíð í trupulleikum
VÍF legði seg á odda tíðliga frammanfyri fjøldini við Tjarnir, men eftir at Asta Sofía F. Hansen javnaði til 4-4 hugdi Kyndil ongantíð afturum seg.
Turið Arge Samuelsen, Bára Krossteig Hansen og Bjarta O. Johansen gingu sum væntað á odda - strikuspælarin hóast hon meiddi sær hondina illa fyri steðgin, men eisini málverjin Gylta á Neystabø gjørdi vart við seg við fleiri góðum bjarginum.
Hesar góðu henni heitið sum dagsins spælari, og hóast munurin, sum onkra løtu var uppi á eini seks málum, til endans tódnaði niður í trý, var sigurin hjá teimum í grønum ongantíð í vanda yvirhøvur.
Hjá VÍF vóru Fríða Nolsøe Olsen og Ingibjørg Olsen toppskjúttar við sjey málum í part, men tilsamans megnaðu tær gulu ikki at hótta í nóg stóran mun, og so máttu tær taka til takkar við silvurinum hesa ferð.
Høgni Heinason gekk fremstur fyri H71, men hann var væl stuðlaður av liðfeløgunum, sum sýndu fram breiddina hjá hoyvíkingum. (Mynd: Bárður Lydersen)
H71 vísti ræðandi styrki
Mansfinalan millum Kyndil og H71 var ikki meir enn byrjað, tá Peter Krogh, sum hevur verið í stórformi, rakti William Skovsager í andlitið við einum leysum armi og fekk reyða kortið.
Eitt skot fyri bógvin hjá H71 - skuldi ein trúð - men so varð ikki. Heldur vístu hoyvíkingarnir sína breidd við einum sera væl spælandi Høgna Heinason á odda. Bakkurin skeyt 10 mál, meðan Jákup Egholm líka skuldi misnýta eitt brotskast, áðrenn restin sat í netinum aftanfyri hjálparleysum málverjum.
Munurin vaks alsamt út á dystin, og tað var eyðsæð, at H71 var sterkara liðið. Mestsum allir tóku av; Brian Slyne skoraði fýra, Boas E. á Skipagøtu tvey, meðan Rókur Ziskason traðkaði inn á plássið hjá Peter Krogh uttan trupulleikar.
Munurin vaks tí til níggju mál, og H71, sum tapti samanlagt í FM-finalunum fyri júst Kyndli í fjør, kundi hevna seg í stórum stíli við 37-28 sigri á hesum sinni.
Í fjør var Helgi H. Hoydal skaddur og spældi ikki í steypafinaluni. Í ár kundi hann væl nøgdur lyfta steypið fyri hoyvíkingar. (Mynd: Bárður Lydersen)
Steypafinalan við kvinnum
VÍF - Kyndil, 26-29 (9-13)
Toppskjúttar, VÍF: Fríða Nolsøe Olsen 7, Ingibjørg Olsen 7, Lív Sveinbjørnsdóttir Poulsen 4, Liljan Muller 3
Toppskjúttar, Kyndil: Turið Arge Samuelsen 8, Bára Krossteig Hansen 4, Bjarta Osberg Johansen 4, Joan Johannesen 4, Asta Sofía F. Hansen
Steypafinalan við monnum
Kyndil - H71, 28 - 37 (13-20)
Toppskjúttar, Kyndil: Ovi Lützen 11, Tobias Thisen 7, William Skovsager 5
Toppskjúttar, H71: Høgni Heinason 10, Jákup Egholm 8, Brian Slyne 4
Er kopiera
Nýggjastu sendingar í ÚV
Leygardag 21. februar
TEMAPLÁTAN: 'Into The Gap' og aðrar útgávur, Thompson Twins 1983-1984-1985
204307
Nýggjastu sendingar í SV
