Valstýrisformaðurin í Oyndarfirði fríkendur fyri at fremja valsvik

(Dagført kl. 15:13)

Einki valsvik er framt í Oyndarfirði - í samband við kommunuvalið í 2024.

Dómur er í dag sagdur í málinum um tann eina valseðilin í Oyndarfirði, sum bleiv kolldømdur, tí hann hevði tveir krossar.

Valstýrisformaðurin í Oyndarfirði var annars ákærdur fyri at hava gjørt atkvøðuna ógilduga við vilja. Ákæruvaldið helt, at hann hevði ábyrgdina av, at valseðilin varð broyttur soleiðis, at hann ikki kundi góðtakast.

Rætturin ikki samdur
Men rætturin var ikki heilt samdur í dóminum.

Í málinum var tað ein løgfrøðiligur dómari umframt tveir dómsmenn, sum skuldu døma í málinum, tí meðan tveir søgdu frídøming, so var tað ein dómsmaður, sum segði, at hann skuldi dømast, og tað hevur við sær, at valstýrisformaðurin bleiv frídømdur.

Ákæruvaldið kravdi annars minst fýra mánaða fongsul til valstýrisformannin, meðan verjin, Christian Andreasen, kravdi frídøming ella treytaðan dóm. 

Málið snúðið seg um eina atkvøðu, sum varð ógildað við finteljing í Runavík, tí hon hevði tveir krossar. Í Oyndarfirði var eingin atkvøða ógildað, tá tær 92 atkvøðurnar vórðu taldar. Ógildingin førdi til javnleik millum tvey valevni, og tann, sum annars hevði vunnið, tapti lutakastið og slapp ikki í býráðið í Runavík.

Ákæruvaldið segði seg hava prógv fyri, at valsvik var farið fram, men verjin helt, at eingi prógv staðfesta, hvør setti seinna krossin – og at allur ivi tí átti at koma tí ákærda til góðar, og tað helt rætturin eisini.

Hetta er fyrsta mál um valsvik í Føroyum.