Fyribils leiðsla tekur við í Iran

Ein nýggj, fyribils leiðsla er sett í Iran, eftir at ovasti leiðarin í landinum, Ali Khamenei, var dripin í gjár.

Løgfrøðingurin, Ayatollah Arafi, fer - saman við forsetanum, Masoud Pezeshkian - at standa fyri fyribils leiðsluni.

Í nátt váttaðu fleiri miðlar, at iranski leiðarin, Ayatollah Ali Khamenei, er deyður.

Sambært Reuters tíðindastovuni var Khamenei staddur á skrivstovu sínari í heiminum í iranska høvuðsstaðnum, Teheran, tá hann varð raktur og doyði.

Ein beinleiðis krígsavbjóðing

Drápið av Khamenei er ein beinleiðis krígsavbjóðing móti muslimum, segði iranski forsetin Masoud Pezeshkian, í morgun.

At hevna tey, sum hava ábyrgdina av deyða Khameneis, er bæði rætturin og skyldan hjá iranum, segði forsetin sambært Reuters tíðindastovuni.

Iranska almenna sjónvarpið boðaði frá, at Khamanei var deyður í álopunum, sum Ísrael og USA framdu.

- Leiðarin og imamurin hjá muslimum. Hansara hátign Ayatollah Seyyed Ali Hosseini Khamenei er farin, segði grátandi verturin í almenna iranska sjónvarpinum millum annað.

Fráboðanin kom, eftir at amerikanski forsetin, Donald Trump, longu hevði sagt, at Khamenei var dripin og ísraelski forsætisráðharrin, Benjamin Netanyahu, hevði boðað frá, t húsini hjá Khamanei í Teheran vóru rakt av hørðum álopum.

Umframt Khamanei eru fleiri onnur hernaðarfólk í høgum størvum í Iran dripin, skriva altjóða miðlar.

Sambært iranska almenna sjónvarpinum er hernaðarleiðarin, Abdolrahim Mousavi, dripin í einum álopi.

Í morgun boðar miðilin, sambært Reuters tíðindastovuni og CNN, frá at bæði Abdolrahim Mousavi, og verjumálaráðharrin, Aziz Nasirzadeh, eru millum teirra í ovastu leiðsluni í iranska herinum, sum eru dripnir.

Iransk álop halda fram

Iran hevur tikið uppaftur mótálop síni, og heldur fram at loypa á amerikonsk mál í økinum, skrivar bretska kringvarpið, BBC.

Tað var tíðliga gjáramorgunin, at Ísrael og USA lupu á mál í Iran, sum svaraði aftur við at skjóta rakettir móti fleiri av grannalondunum. 

Álopini í miðeystri halda fram, og AFP tíðindastovan skrivaði fyrrapartin, at fleiri spreingingar vóru at hoyra í iranska høvuðsstaðnum, Teheran, í morgun.

Ísraelski herurin váttar, sambært AFP, at ein nýggj røð av álopum er sett í verk móti Teheran, og at ísraelski herurin loypir á mál hjá iranska stýrinum í Teheran.