- Tíðindi, mentan og ítróttur
Búskaparráðið: Størri búskaparvøkstur enn mett
Búskaparráðið: Størri búskaparvøkstur enn mett
Metingin av búskaparvøkstrinum í fjør er hækkað munandi í várfrágreiðingini hjá Búskaparráðnum, sum eisini finst at landi og kommunum fyri at hava hall í bestu tíðum
Johnny í Grótinum, formaður í Búskaparráðnum, sum í dag leggur fram várfrágreiðingina.
Mynd: Bjarni Árting Rubeksen
02.03.2026 - 13:58
Búskaparráðið hevur fyri løtu síðani almannakunngjørt várfrágreiðingina, sum skal vísa búskaparligu konjukturgongdina í Føroyum.
Sambært frágreiðingini gongur væl í føroyska búskapinum. Vøksturin í leypandi prísum í fjør var mettur til 2,0 prosent í heystfrágreiðingini. Men nú er vøksturin fyri 2025 mettur til 5,8 prosent. Metingin fyri í ár er 6,2 prosent, sum er at kalla óbroytt.
Størri búskaparvøkstur enn væntað
Búskaparligu vísitølii eru positiv, og tað er fyrst og fremst privata nýtslan og útflutningurin, sum toga vøksturin upp í 2026, sigur Búskaparráðið.
Fyri pelagiska fiskiskapin væntast betri prísir í 2026 og kvotuniðurskurð á makreli og svartkjafi. Harafturat væntast vøkstur bæði í nøgd og prísi á laksi, sum tilsamans merkir, at útflutningsvirðið fer at hækka.
Hall í almenna geiranum í bestu tíðum
Landskassin hevur væntandi eitt hall upp á umleið 50 milliónir krónur í fjør. Tað er frægari enn 390 milliónir krónur í halli, sum áður mett. Orsøkin til betraða úrslitið er, at raksturin er betraður. Kommunurnar fara væntandi eisini at hava hall.
Búskaparráðið finst at bæði landi og kommunum fyri at hava hall í bestu tíðum. Um almennar útreiðslur til rakstur og íløgur hækka í góðum tíðum, so er tað við til at ovurhita búskapin. Og tað rindar alt samfelagið fyri við hægri prísum.
Tað er bráðneyðugt at fáa búskapin hjá tí almenna at hanga saman nú og í framtíðini, men politiski myndugleikin er sera trekur at gera tær nýskipanir og sparingar, ið skula til, sigur Búskaparráðið m.a. í várfrágreiðingini frá Búskaparráðnum.
Myndir: Bjarni Árting Rubeksen
Er kopiera
Nýggjastu sendingar í ÚV
Nýggjastu sendingar í SV
