Demokratia vil hava fleiri kvinnur at stilla upp

Demokratia fer næstu dagarnar at skipa fyri valtiltøkum kring landið við tí endamáli at fáa fleiri kvinnur at stilla upp til løgtingsvalið.

Tað sigur Demokratia í tíðindaskrivi, sum er sent miðlunum. Og fyrsta tiltakið verður í Listasavninum á Sandi í kvøld, týskvøldið, klokkan 19 - og IKKI mikukvøldið, sum tað annars stóð skrivað.

Á skránni í annaðkvøld er samrøða við Katrina Kallsberg, fyrrverandi løgtingskvinnu, ein framløga frá Demokratia um, hví færri kvinnur gera av at stilla upp enn menn, og so verður eisini tónleikur frá Tóru Trónd á skránni. 

Samstarv millum flokkar

Demokratia er eitt samstarv millum politisku flokkarnar, og vil við sínum tiltøkum skapa upplýsandi og eggjandi prát um kvinnuumboðan og uppstilling. Saman við royndum politikarum veitir felagsskapurin karmarnar til at fáa svar upp á einhvønn brennandi spurning, sum møgulig valevni munnu ganga við, áðrenn avgerðin verður tikin um at bjóða seg fram.

- Tað er alneyðugt fyri okkara fólkaræði, at vit hava sterka kvinnuumboðan á Føroya løgtingi, tá atkvøðurnar eru taldar hóskvøldið 26. mars, sigur Demokratia millum annað, og leggur aftrat, at skal  javnstøðan á løgtingi økjast, er fortreytin, at nógvar sterkar kvinnurøddir finnast á valevnislistunum.

Tí ræður um at tryggja, at veljarin hevur nokk at velja í, sigur Demokratia.