Iran leggur minur út í Hormuz-sundið

Iran tykist royna at taka allan heimin til gísla í krígnum við USA og Ísrael. Tað sæst, nú landið er farið undir at leggja út minur í Hormuz-sundið, har fimtingurin av oljuni og gassinum, sum heimurin brúkar, fer gjøgnum. 

Tað skrivar CNN.

Sambært keldum hjá CNN, sum standa amerikonskum fregnartænastum nær, eru ikki nógvar minur lagdar út enn, okkurt um 50 minur. Men Iran ræður enn yvir nærum øllum sínum smáu bátum og minuleggjarum, so tað ber til hjá iranskum herdeildum at leggja hundraðtals minur í Hormuz-sundið. 

Hava tamarhald á sundinum

Kollveltingarhirðin og sjóverjan hjá Iran hava, sum er, tamarhald á sundinum og hava førleikarnar at bjóða av við minuleggjarum, bátum fyltum við spreingievni og rakettum á landi, skrivar CNN.   

Kollveltingarhirðin hevur ávarað um, at øll skip, sum sigla gjøgnum sundið, verða álopin.

Trump hóttir við báli og brandi

Amerikanski forsetin Donald Trump hótti í gjárkvøldið Iran við báli og brandi, um landið legði út minur:

 - Um tað av onkrari orsøk eru lagdar minur út, og tær ikki verða tiknar burtur alt fyri eitt, so verða hernaðarligu avleiðingarnar fyri Iran á einum stigi, sum ongantíð er sæð áður. Men verða minurnar tiknar innaftur, so er tað eitt stórt stig rætta vegin, skrivaði Donald Trump.

Iran hevur hvørki váttað ella avsannað, at landið hevur lagt minur út í Hormuz-sundið.