Grønland: Siumut farin úr landsstýrissamgonguni

Siumut er farin úr grønlendska landsstýrinum.

Tað upplýsir Jens-Frederik Nielsen, landsstýrisformaður, sambært Sermitsiaq.

Siumut hevur seinastu dagarnar hótt við at fara úr landsstýrissamgonguni, tí tvær landsstýriskvinur stilla upp til fólkatingsvalið.

Tær eru Anna Wangenheim í Demokraatit, og Naaja H. Nathanielsen í IA.

Siumut upplýsir, at Vivian Motzfeldt, sum hevur verið landsstýriskvinna í uttanríkismálum, hevur lagt frá sær.

Hon hevur havt stóran leiklut í sambandi við diplomatisku kreppuna millum Grønland og USA, og Vivian Motzfeldt hevði fund við amerikanska varaforsetan, J.D. Vance, og uttanríkisráðharran, Marco Rubio, fyrr í ár saman við danska uttanríkisráðharranum, Lars Løkke Rasmussen. 

Harmast

Jens-Frederik Nielsen, landsstýrisformaður,  sigur seg harmast um, at Siumut fer úr samgonguni, nú Grønland er undir stórum trýsti og uppmerksemi frá umheiminum. 

- Henda støðan hevur gjørt, at tað hevur havt týdning hjá mær at hava so breiða samgongu sum til ber, sigur hann.

Allir flokkar uttan Naleraq manna landsstýrið í Grønlandi, sum var skipað eftir valið fyri einum ári síðani.

Siumut tódnaði niður í helvt, og fekk bara fýra sessir í landstinginum. 

Stutt eftir legði Erik Jensen frá sær sum formaður í Siumut, og Vivian Motzfeldt tók við fyribils.

Men hon tapti stríðsvalið um sessin fyri Alequ Hammond, sum aftur gjørdist forkvinna í Siumut.