Fimti hvør ivast, hvar krossurin skal setast

Fimti hvør veljari ivast framvegis, hvar krossurin skal setast á løgtingsvalinum.

Nýggj veljarakanning, sum Lóður hevur gjørt fyri Kringvarpið, vísir, at 19,9 prosent av teimum spurdu hava ikki enn tikið støðu til, hvønn flokk tey fara at velja. 

Tað svarar til, at umleið fimti hvør veljari enn ivast, nú løgtingsvalið nærkast.

Veljarakanning mars 2026 - Mynd: Lóður

(Mynd: Lóður)

Fólkaflokkurin størstur

Kanningin vísir, at Fólkaflokkurin er størstur við 28,8 prosentum av atkvøðunum. Tað gevur flokkinum 10 tingsessir, sum eru fýra fleiri enn á valinum í 2022.

Sambandsflokkurin fær 21,9 prosent og stendur til at varðveita sínar sjey tingsessir.

Javnaðarflokkurin fær 17 prosent og seks tinglimir, tríggjar færri enn seinast. 

Tjóðveldi fær 15,1 prosent og fimm tinglimir, sum er ein minni enn á seinasta løgtingsvali.

Veljarkanning mars 2026, tingsessir - Mynd: Lóður

Miðflokkurin ein sess aftrat

Miðflokkurin stendur til at fáa 7,6 prosent og tríggjar tinglimir - ein meira enn seinast. Framsókn fær sjey prosent av atkvøðunum og tveir tinglimir - ein minni enn seinast. Sjálvstýrisflokkurin fær 2,6 prosent, og kemur sambært kanningini ikki á ting.

Aftrat teimum, sum ivast, so siga 2,2 prosent, at tey fara ikki á val, meðan 3,1 prosent siga, at tey fara at atkvøða blankt.

Óvissan í veljarakanningini er millum 1,3 prosent og 3,6 prosent - alt eftir, hvussu nógv hvør flokkur fær.

810 tilvildarliga útvald fólk í aldrinum 18–75 ár svaraðu kanningini gjøgnum telefon ella á netinum í tíðarskeiðnum frá 9.–13. mars 2026.