Ymiskar freistir at greiða brævatkvøðu til fólkatings- og løgtingsvalið

Fleiri kommunur hava upplýst skeiva freist fyri brævatkvøðu til fólkatingsvalið 24. mars. 

Tað boðar Ríkisumboðið frá.

Freistin at brævatkvøða til fólkatingsvalið er næstseinasta gerandisdag fyri valið. Fólkatingsvalið verður týsdagin 24. mars. Tað merkir, at freistin fyri at greiða brævatkvøðu til fólkatingsvalið er longu nú leygardagin 21. mars,

Ríkisumboðið boðar samstundis frá, at av tí, at seinasta freist fyri at brævatkvøða fellur á ein leygardag, tað er leygardagin 21. mars, mugu veljarar sjálvir kanna, um tað í teirra kommunu ber til at brævatkvøða eftir vanliga skrivstovutíð fríggjadagin 20. mars - um tað altso ikki ber til at greiða atkvøðu áðrenn tað.

Freistin dagin fyri til løgtingsvalið

Til løgtingsvalið hósdagin 26. mars er seinasta freist at brævatkvøða dagin fyri sjálvan valdagin.

Harvið er freistin at brævatkvøða til løgtingsvalið sostatt mikudagin 25. mars. 

Annars eru mannagongdirnar í sambandi við at brævatkvøða til fólkatingsvalið og løgtingsvalið tær somu, sigur Hilmar Høgenni, deildarstjóri á Umhvørvis- og familjudeildini í Uttanríkis- og Mentamálaráðnum.