Smyril Line hevði metúrslit í fjør

Smyril Line hevði eitt avlop upp á 147 milliónir krónur í fjør eftir skatt, sum er ein framgongd samanborið við árið frammanundan og eitt av bestu úrslitum hjá felagnum, sigur felagið í tíðindaskrivi.

Leiðslan metir úrslitið vera nøktandi og vísir á, at felagið hevur staðið seg væl, hóast økt kostnaðartrýst, lógarbroytingar og nýggj vinnugjøld.

Smyril Line sigur, at felagið hevur styrkt sína støðu sum álítandi flutningsveitari í Norðuratlantshavi, bæði innan ferðafólka- og farmaflutning.

- Felagið er framvegis fíggjarliga væl fyri og arbeiðir víðari við stórum íløgum, millum annað nýggjum skipum og útbyggingum, sum skulu tryggja vøkstur og burðardyggan rakstur frameftir, skrivar Smyril Line í tíðindaskrivi.