Argir: Valluttøkan 10 prosent lægri higartil

Klokkan fýra høvdu 773 fólk verið og greitt atkvøðu á Argjum.

Tað svarar til 41,63 prosent av teimum 1.857 veljarunum, sum hava valrætt, sigur Sólrun Gleðisheygg, forkvinna í valstýrinum.

Tað eru góð tíggju prosent færri enn til seinasta løgtingsval, tá 845 fólk høvdu valt um somu tíð. Tað svaraði tá til 51,7 prosent.

Og samanborið við fólkatingsvalið týsdagin er hugurin at velja tíðliga á Argjum munandi verri í dag. Ikki tí, tann samanberingin er ikki røtt, tí tað er hvør sítt val og valmynstur, men týsdagin lógu tølini á Argjum javnt og samt trý prosent hægri enn í 2022.

Eisini talið av brævatkvøðum er lægri á Argjum hesa ferð enn til seinasta løgtingsval. Tá vóru 188 brævatkvøður, í ár eru tær 167.

Spurningurin er so, um valluttøkan á Argjum slær hana fyri fýra árum síðan. Tá var valluttøkan 90,1 prosent.