Læna fleiri pengar

Váðaráðið heftir seg við, at føroysku peningastovnarnir eru farnir at læna fleiri pengar.

Útlánsvøksturin var níggju prosent í januar.

Serliga privata vinnan lænir pengar.

Váðaráðið hevði fund 25. mars.

Metingin hjá tí er framvegis, at í løtuni eru ikki greið tekin um, at systemiskir váðar eru í umbúnaði í føroyska peningastovnsgeiranum.

Systemiskir váðar eru veikleikar ella ójavnvág í fíggjargeiranum, sum í ringasta føri kunnu elva til kreppu. 

Ein váði er systemiskur, um hann kann væntast at raka allan fíggjargeiran ella týðandi part av honum.

Stórt virksemi

Váðaráðið vísir eisini á, at virksemið í føroyska búskapinum hevur verið stórt í nógv ár á rað við einum teprum arbeiðsmarknaði og veksandi sethúsaprísum.

Tað kann vera tekin um, at sykliskir systemiskir váðar eru í umbúnaði. 

Sykliskir systemiskir váðar eru, tá búskapurin er góður og fólk eru bjartskygd.

Tá kunnu tey taka stór lán, hóast tey hava við sær kroysta fíggjarliga støðu.

Váðaráðið sigur seg hava vakið eyga við viðurskiftum, sum kunnu ávirka fíggjarliga støðufestið í føroyska peningastovnsgeiranum.