Álop á Iran í nátt

Spreingingar hava verið í pørtum av Teheran og í Karaj, sum er í útnyrðing úr býnum, skriva iranskir miðlar í nátt. 

Álop skulu hava verið á eitt bústaðarøki.

- Fyri løtu síðani hoyrdust spreingingar í Teheran og Karaj, skriva lokalu miðlarnir Fars og Mehr á Telegram. 

Hálvalmenni miðilin Mehr skrivar seinni, at ein amerikansk-ísraelsk rakett hevði lagt eina synagogu í Teheran í oyði.

Nakað seinni boðaði Reyði hálvmáni frá, at eitt íbúðarøki í iranska høvuðsstaðnum var bumbað, og at bjargingarfólk leita nú í húsatoftunum eftir fólki.

Ísraelski herurin (IDF) sigur seg hava framt fleiri loftálop, sum skulu raka "undirstøðukervið hjá iranska stýrinum í Teheran og øðrum økjum í landinum".   IDF hevur nýtt líknandi orðingar um náttarálop á Iran, síðani Ísrael og USA byrjaðu kríggið 28. februar.

Seint í gjár skrivaði Reuters, at ein varaguvernørur segði við almennar miðlar, at flogvøllurin í býnum Kashan aftur var fyri álopi. Býurin liggur miðskeiðis í Iran, umleið 200 kilometrar sunnan fyri Teheran.

Donald Trump

Hóttir við at bumba Iran aftur í steinøldina

Amerikanski forsetin, Donald Trump, hótti á páskum við at bumba Iran "aftur í steinøldina" og gera eitt "helviti" á landið. 

Í gjár segði hann við fjølmiðlar, at alt landið kann verða bumbað "eftir einari nátt", og at tað kann henda týsdagin, altso í dag.

- Vit fáa at síggja, hvat hendir, segði Trump.

Hann var spurdur, um hann var stúrin um ætlanina at bumba iransk orkuverk og brýr.

- Hvør brúgv og hvørt eitt einasta orkuverk verða løgd í oyði mikunáttina, um Iran ikki aktar boðunum, segði Trump á tíðindafundinum.

- Vónandi noyðist eg ikki at gera tað, svaraði Donald Trump.

- USA vil hjálpa iranum at endurreisa landið. Men um USA loypir á Iran, tekur eindureisingin upp í 100 ár, segði amerikanski forsetin.