Netanyahu: Vápnahvíldin fevnir ikki um Libanon

Ísraelski herurin, IDF, sigur, at hann fer at halda fram við álopum sínum á Suðurlibanon.

Í fráboðan í morgun sigur IDF, at íbúgvarnir í býnum Tyre skulu fara frá húsum sínum alt fyri eitt, tí økið verður bumbað. Heitt verður á sivilfólk um at fara norður um Zahrani-ánna.

Ávaringin kemur eftir, at ísraelski forsætisráðharrin, Benjamin Netanyahu, segði, at avtalan um fyribils vápnahvíld millum USA, Ísrael og Iran ikki fevnir um Libanon.

Landið hevur verið rakt av umfatandi ísraelskum loftálopum, serliga har suðuri, síðani 2. mars.

Harumframt hava ísraelskar herdeildir gjørt innrás í partar av landinum, og ísraelska stjórnin hevur ávarað um, at Ísrael enn einaferð fer at hertaka partar av Libanon í óavmarkaða tíð.

Yair Lapid - mynd: Jerusalem Post

Andstøðuleiðari: Ein vanlukka

- At Ísrael ikki er við í samráðingunum um vápnahvíldina í krígnum móti Iran er ein politisk vanlukka fyri landið, sigur andstøðuleiðarin, Yair Lapid.

- Slík politisk vanlukka hevur ongantíð verið í allari okkara søgu. Ísrael var ikki so frægt sum við borðið, tá avgerðir um kjarnan í okkara tjóðartrygd vórðu tiknar, skrivar Lapid á X í morgun.

Sambært honum hevur Benjamin Netanyahu, forsætisráðharri, als ikki megnað at handfara kríggið móti Iran, sum Ísrael og USA byrjaðu seinast í februar. Í nátt okkara tíð boðaði amerikanski forsetin, Donald Trump, frá vápnahvíld í tvær vikur.

- Tað fer at taka okkum fleiri ár at umvæla politiska og strategiska skaðan, sum Netanyahu hevur elvt til orsakað av arrogansu, gáloysni og vantandi strategiskari tilrættalegging, skrivar Yair Lapid m.a. á X.