RUV eftir ósigurin: "Føroyingar tóku alt, eisini okkara víkingaklapp. HUH!"

Tíðin, tá føroyingar vóru teir íslendsku víkingarnir, ið ikki megnaðu túrin yvir um hav, er væl og virðiliga farin aftur við borðinum. 

Hinvegin, so er tað ikki farið afturvið borðinum hjá íslendska ríkiskringvarpinum, RUV, at føroyingar - víkingum so líkt - tóku alt, tá hondbóltskvinnurnar smurdu tær íslendsku av við Tjarnir í gjárkvøldið. 

Føroysku áskoðararnir løgdu spott afturat skaðanum, heldur RUV, við eisini at rána víkingaklappið frá íslendingum, tá teir fagna føroysku hondbóltskvinnunum. 

Tað vóru íslendingar, ið gjørdu eykandi herrópið heimskent til EM-endaspælið í fótbólti í Fraklandi í 2016, tá Ísland vann seg í fjórðingsfinaluna. 

"Okkara egna herróp? Føroysku kvinnurnar vóru fagnaðar við víkingaklappinum, tá tær vunnu á Íslandi í EM-undankappingardystinum í Havn."