Trump fer ikki at leingja vápnahvíldina við Iran

Amerikanski forsetin, Donald Trump, fer ikki at leingja vápnahvíldina millum USA og Iran.

Tað sigur hann í telefonsamrøðu við amerikanska miðilin, CNBC.

Hann leggur aftrat, at USA stendur sterkt í samráðingunum og fer at fáa eina "góða avtalu" við Iran, skrivar Reuters.

Samstundis sigur hann í samrøðuni, at hann væntar, at álopini í Iran verða tikin uppaftur, um partarnir ikki finna eina semju, áðrenn vápnahvíldin fer úr gildi í morgin.

Nýggjar samráðingar millum USA og Iran skuldu eftir ætlan byrja í pakistanska høvuðsstaðnum, Islamabad, í gjár, men Iran noktaði at halda fram við friðarroyndunum, skrivar norska kringvarpið.

Ivi um samráðingarnar

Ivasamt er, um partarnir hittast til nýggjar samráðingar, áðrenn vápnahvíldin millum londini fer úr gildi í morgin.

Eftir ætlan skuldi amerikanski varaforsetin, J.D. Vance - sum partur av amerikonsku sendinevndini - til pakistanska høvuðsstaðin Islamabad at samráðast við Iran.

Men framvegis hava amerikanskir myndugleikar ikki váttað, at sendinevndin hevur sett kós móti Pakistan.

Almenna fráboðanin frá Iran er framvegis, at sum støðan er, fer Iran ikki til samráðingarborðið.

Eftir at USA og Ísrael lupu á Iran seint í februar, blivu partarnir samdir um eina vápnahvíld 8. apríl.