SjóGló er danmarksmeistari í íverksetan

SjóGló úr Eysturskúlanum í Havn vann í gjár danmarksmeistaraheitið í íverksetan.

Kappingin var í Kolding.

Hon var fyri næmingar í áttanda til tíggjunda flokk í fólkaskúlanum í Danmark, Grønlandi og Føroyum. 

Dentur verður lagdur á nýhugsan, burðardygd og altjóða sjónarmið.

Tey, sum kappast, skulu eisini vísa, hvussu verkætlanirnar samsvara við heimsmálini hjá ST um burðardygga menning.

SjóGló var við, tí SjóGló vann SkúlaFM 2026, sum Íverksetarahúsið skipar fyri í samstarvi við Mentamálaráðið.

Vitaminir úr fiskaskræðu

Vinnandi verkætlanin er at gera vitaminir úr fiskaskræðu og við tí gagnnýta føroyska rávøru til eina nýggja, virðismikla og burðardygga vøru.

Sum grundgeving legði danska dómsnevndin millum annað dent á, at vøran hjá SjóGló er sera tíðarhóskandi, væl ment og roynd.

Eisini søgdu dómararnir, at tær vóru sera djarvar at taka á seg so stóra verkætlan, uttan nakrar royndir frammaundan.

Í SjóGló eru Nikolina Flora Højgaard Kristjansdóttir, Bjørk Dánjalsdóttir Absalonsen, Elin Joensen og Heiðrun Torbjørnsdóttir Lisberg, allar í níggjunda flokki í Eysturskúlanum.

Lærarar eru Asta Eysturdal Nielsen og Johann J. Petersen.