Trump boðið Putin á G20-toppfund í USA

Amerikanski forsetin, Donald Trump, bjóðar russiska forsetanum, Vladimir Putin, til G20-toppfundin, sum verður í Miami í Florida í desember.

Trump hevur lovað stórslignan fund, tá USA verður vertur fyri 20 teimum størstu búskapunum í heiminum.

Eitt embætisfólk í Hvítu Húsunum segði í gjár, at Putin er millum tey innbodnu. Russland er eitt av londunum í G20.

- Allir G20-limirnir verða bodnir til ráðharrafundirnar og leiðaratoppfundin, stendur í fráboðan frá Hvítu Húsunum.

Trump viðmerkti seinni sjálvur boðini, tá hann hitti tíðindafólk.

Veit ikki um Putin kemur

Trump tyktist ikki vita meira um innbjóðingina:

- Eg veit ikki, um hann kemur. Eg ivist í, um hann kemur, um eg skal vera erligur.

Trump fanst at fyrrverandi amerikanska forsetanum, Barack Obama, fyri at hava koyrt Russland úr táverandi G8-felagsskapinum. Tað var amerikanska svarið til innrásina hjá Russlandi í Ukraina í 2014, har russar løgdy Krim-hálvoynna undir seg.

- Putin var sera argur um tað, og tað skilji eg væl, segði Trump.

Enn hevur Putin ikki tikið støðu til, um hann kemur á G20-fundinum í ár, segði Kreml í gjár

Putin hevur ikki verið á G20-toppfundi síðani 2019, fyrst orsakað av koronufarsóttini og síðani orsakað av Ukraina-krígnum.