Verkafólk hava framvegis nógv at stríðast fyri

1. mai er ein týdningarmikil dagur at halda. 

Tað slær Elin Kamilla Sørensen, forkvinna í Føroya Arbeiðarafelag, fast. 

- Nógv er hent, men kortini er nógv eftir at stríðast fyri, sigur hon. 

Kenna seg ikki trygg

Sambært Elin Kamillu Sørensen hava verkafólk vunnið nógv rættindi, men enn væntar tryggleikin í gerandisdegnum. 

- Tey flestu í dag eru tímalønt. Tey eru ikki tryggjað 40 tímar um vikuna, sigur forkvinnan.

Við tí fáa tey ikki eina fasta løn, og tað er við til at skapa ein ávísan ótryggleika.

Eru ikki komin á mál

Tað snýr seg eisini stríðið um at varðveita vunnin rættindi, spyrt tú Elina Kamillu Sørensen.

Eitt dømi um tað er útlendsk arbeiðsmegi, sum kemur til landið og sum ikki er partur av einum fakfelag,

- Tey kenna ikki til síni rættindi og fáa at vita, at um tey ikki makka rætt, missa tey starvið. Tað máar undan teimum rættindum, sum fólkið hevur í dag, tá sáttmálin ikki verður hildin.