Óli og GOG í DM-hálvfinalurnar

Óli Mittún skal spæla hálvfinalur í kappingini um danska meistaraheitið í hondbólti.

Tað gjørdist greitt, tá GOG smurdi Skjern av á heimavølli og tryggjaði sær 2. plássið í sínum bólki í endaspælinum aftanfyri Aalborg.

Føroyski bakspælarin var stórspælandi og taldist millum teir bestu hjá teimum gulu og reyðu. Hann skoraði seks mál upp á níggju málroyndir og átti harafturat næstsíðstu hond á heili sjey málum.

GOG hevur ein dyst eftir í bólkaspælinum. Hann er á útivølli ímóti Aalborg, sum er trý stig frammanfyri, og tí kann GOG ikki fáa stórliðið aftur.

Í løtuni sær út til, at GOG skal møta SAH, har Jóhan á Plógv Hansen telist millum lyklaspælararnar, í hálvfinalunum. SAH er fremst í sínum bólki í løtuni frammanfyri Mors-Thy.

Jana rakk ikki endaspælinum - Súna og tær bjargaðu sær

Um vikuskiftið varð eisini greitt, at Jana Mittún og Viborg ikki røkka hálvfinalunum í kappingini um meistaraheitið. Viborg tapti 30-35 fyri Odense á heimavølli í einum dysti, har Jana Mittún skeyt fýra mál og legði upp til seks. Harumframt vann hon Viborg trý brotskøst.

Kappingarárið hevur kortini meir at bjóða upp á. Jana Mittún og tær skulu nevniliga spæla Final Four í European League miðskeiðis í mai.

jana_mittun.jpg

Frítekst tagging: 

Ítóttur

Hondbóltur

Viborg HK

Jana Mittún

Í hinum endanum á stigatalvuni var Súna Krossteig Hansen týðandi, tá Skanderborg vann á Aalborg og tryggjaði sær plássið í bestu deildini. Baksspælarin, sum er á veg til Buducnost í Montenegro, skoraði seks, legði upp til eitt og vann fleiri brotskøst.

Tað verður tí Aalborg, sum skal spæla upp- og niðurflytingardystir. Aalborg hevur landsliðsmálverjan, Anniku Fríðheim Petersen í hópinum, men hon hevur mestsum ikki spælt í fleiri mánaðir og skiftir til Enea MKS Gniezno í bestu pólsku deildini í summar.

Tað verður Ajax Keypmannahavn við teimum trimum landsliðsspælarunum, Elsu Egholm og Lív og Vár Bentsdóttir Zachariasen, sum skulu spæla ímóti Aalborg og royna at flyta upp í bestu deildina.

Høj við Maritu Mortensen á liðnum vann niðara endaspælið. Bakkurin er á veg til Nykøbing Falster. Ringkøbing við Raku Wardum í málinum endaði á 2. plássi í niðara endaspælinum.