Svenska sjóverjan tikið skip í russiska skuggaflotanum

Svenska sjóverjan fór í gjár umborð á eitt skip, sum er undir illgruna fyri at vera partur av sonevnda skuggaflotanum hjá Russlandi.

Tað skrivar svenski ráðharrin fyri sivilverju, Carl-Oskar Bohlin, á X.

Skipið eitur Jin Hui, og verður hildið at sigla undir følskum flaggi.

Skipið er, skrivar Bohlin, á listanum hjá ES, Bretlandi og Ukraina um revsitiltøk.

Á veg inn í Eystrasalt

Sambært almennum skipadátum frá Marine Traffic, kom skipið úr Skagerrak og sigldi gjøgnum Oyrarsund, millum Svøríki og Danmark, á veg inn í Eystrasalt.

Hetta er fimtu ferð, at svenska sjóverjan fer umborð og steðgar einum tangaskipi á henda hátt.

Skuggaflotin er skip, sum sigla undir flagginum hjá øðrum londum, men í roynd og veru eru knýtt at Russlandi gjøgnum fløktar ognar-skipanir, og verða brúkt til at sleppa uttan um revsitiltøk. 

Nógv teirra eru í ringum standi og hava onga trygging.