Fleiri enn 100 leiguíbúðir við Villingardalsvegin

Húsavarðartænastan hevur keypt grundøki frá Tórshavnar kommunu, og nú verður samráðst við íleggjarar, sum skulu keypa íbúðirnar at leiga út

Tórshavnar kommuna hevur selt Húsavarðartænastuni grundøki við Villingardalsvegin at byggja fleiri enn 100 leiguíbúðir á.

Jón Brian Hvidtfeldt

19.05.2026 - 12:59

Ein roynd verður nú gjørd at byggja fleiri enn 100 leiguíbúðir á eitt stykki við Villingardalsvegin í Havn.

- Vit eru í samráðingum við íleggjarar, sum hava áhuga at seta pengar í verkætlanina, sigur Regin Petersen, stjóri í Húsavarðatænastuni, sum skal byggja íbúðirnar.

Skeytið varð undirskrivað í gjár. Húsavarðatænastan keypir eitt 12.622 fermetrar stórt grundøki fyri fimm milliónir krónur.

Húsavarðatænastan er í løtuni í samráðingum við íleggjarar, sum vilja keypa íbúðirnar, fyri síðani at leiga tær út.

Tað er stór íløga at byggja 110 til 140 íbúðir. Taka vit sum leysligt dømi, at byggjast skulu 10.000 fermetrar fyri 25.000 krónur fermeturin, so er talan um eina fjórðings milliard krónur.

Hoyr innslag í útvarpstíðindunum:

19052026_Leiguibudir