Heilsuhjálparar og heilsurøktarar verða nú eisini útbúnir í Havn

Freistin at søkja um nýggja møguleikan hjá Heilsuskúlanum at útbúgva seg til heilsuhjálpara ella heilsurøktara er í morgin, 22. mai.

Heilsuskúlin fer at hava ein heilsuhjálparaflokk í Havn. 

Útbúgvingin er ætlað starvsfólkum, sum eru 25 ár ella eldri, og hava trý ára arbeiðsroyndir á eldraøkinum. 

Útbúgvingin varar 25 vikur og byrjar í august. 

Undirvísing í Havn og í Suðuroy

Harumframt fer skúlin undir ein nýggjan og meira smidligari leist fyri heilsurøktaraútbúgvingina.

Har kunnu fólk taka skúlaskeiðini samstundis sum tey eru í starvsvenjing. 

Hendan útbúgvingin verður lutvíst skipað sum fjarlestur, sum undirvísing í Havn og í Heilsuskúlanum í Suðuroynni.

Tórshavnar kommuna hevur sett av tvær milliónir krónur í fíggjarætlanini fyri 2026 til at útbúgva heilsustarvsfólk.

Kommunan sigur, at hon er til reiðar at gera fleiri útbúgvingarsáttmálar um heilsustarvsfólk.