Sernám verður deild í Undirvísingarstýrinum

Bárður á Lakjuni, landsstýrismaður í mentamálum, hevur gjørt av, at Sernám frá 1. juni verður ein deild í Undirvísingarstýrinum.

Sostatt verður fyribilsskipanin, sum hevur verið galdandi síðani 1. september 2025, varandi.

Endamálið við bygnaðarbroytingini er at skapa størri samanhang millum sernámsfrøðiliga virksemið og undirvísingarøkið sum heild – serliga innan fólkaskúlan, har nógv av virkseminum hjá Sernámi er.

Samstundis verður eisini arbeitt fyri samstarvi við dagstovnaøkið og miðnámsøkið, sum bæði fáa ráðgeving frá Sernámi, sigur Mentamálaráðið.

Bárður á Lakjuni, mynd: Bjarni

Frítekst tagging: 

Bárður á Lakjuni

mynd: Bjarni Árting Rubeksen

Faklig deild

Í nýggja bygnaðinum verður Sernám ein faklig deild í Undirvísingarstýrinum við ábyrgd av sernámsfrøðiligari ráðgeving, fakligari menning og samstarvi við dagstovnar, skúlar og onnur tilboð. Dentur verður lagdur á at styrkja inklusjón og fyribyrgjandi arbeiði.

Samtíðis er lagt upp fyri at tryggja gott og skipað samstarv við Nám á teimum økjum, har fakligur samanhangur er, millum annað innan námsætlanir, eftirútbúgving og menning av undirvísingartilfari.

Undirvísingarstýrið fer nú at søkja eftir deildarleiðara til Sernám. Ætlanin er, at viðkomandi byrjar í starvinum 1. august.