33,3 milliónir til sambýli

Tilsamans skulu sjey fólk búgva á heiminum.

Ein samd fíggjarnevnd tekur undir við uppskotinum hjá landsstýriskvinnuni Margit Stóra at brúka 33,3 milliónir krónur til ætlanina.  

Tað stendur í álitinum, sum varð lagt fram á tingfundi í dag.

Higartil eru brúktar 12,4 mió. krónur, og nú ætlar fíggjarnevndin at játta 20,9 milliónir krónur afturat.  

Samlaði kostnaðurin av byggistigi 1 verður sostatt 33,3 milliónir krónur.

1. byggistig er at dagføra og umvæla eina ogn í Miðvági, ið skal nýtast sum sambýli hjá sjey fólkum við menningartarni og samansettum avbjóðingum, harímillum autismu.

Arbeiðið skal vera liðugt í 2029

2. byggistig

Í seinna byggistiginum, sum ikki er umfatað av hesum lógaruppskotinum, er ætlanin at byggja eitt nýtt sambýli við síðuna av hesum sambýlinum, har pláss verður til 12 fólk við sálarligum og sosialum avbjóðingum.

Nýggju sambýlini skulu avloysa stovnar í Sandavági og Sørvági.

2. viðgerð av málinum verður týsdagin.